«Kjære Get Bruker» var tittelen på pop up-vindauget som dukka opp på skjermane til fleire av kundane til selskapet tidlegare i vår. Vidare sto det at forbrukarar kunne vinne ein ny mobiltelefon ved å delta i ei undersøking. Bakmennene hadde kopiert layouten til Get, så det såg ut som det var selskapet sjølv som hadde sendt ut spørjeundersøkinga.
Sel kontaktinfoen din
I tillegg til Get, har mellom anna Elkjøp, Expert , Komplett.no, Netflix og Spotify blitt utsett for misbruk av eigne merkevarar den seinare tida, og fleire forbrukarar har gått i fella.
– Mange opplys at dei berre skulle vere med på ein konkurranse eller ei spørjeundersøking, men så endar dei opp med noko heilt anna enn dei såg for seg: Store mengder uønska reklame på e-post, oppringingar frå telfonseljarar og abonnement som tappar kontoen, seier fungerande forbrukarombod Bente Øverli.
Utanlandske selskap står bak
Det er først og fremst utanlandske selskap, som baserar verksemda si på å samle inn personopplysningar, som står bak. Opplysningane blir selt vidare til marknadsføringsselskap som sender ut e-postreklame og driv telefonsal.
Forbrukarombodet har sendt over saker til tyske og danske forbrukarmyndigheiter der det bes om at dei grip inn mot selskap som misbrukte høvesvis Get og Elkjøp sine merkevarar for å få forbrukarar til å gi frå seg kontaktinformasjonen sin.
– Svindlerane veit at forbrukerane har større tiltru til kampanjen når det er kjende næringsdrivande som tar kontakt. Dessverre er det no for tida fullt av kampanjar som lokkar med fine premiar, men der det er useriøse aktørar som står bak. Forbrukarane bør aldri gi frå seg kontaktinfo og kortopplysningar i slike konkurransar, seier Øverli.
Tips for å avsløre svindlarane
- Ver kritisk til tilbod som verker for gode til å vere sanne.
- Sjekk internettadressa på pop up-vindauget. Står Get eller Elkjøp verkeleg bak, vil adressa ofte begynne med «www.get.no/…» eller «www.elkjop.no/…
- Søk på internett etter erfaringar med den aktuelle kampanjen, samt erfaringar med selskapet som står bak dette «utrulege» tilbodet.
- Ver kritisk til kor du legg igjen kortinfo eller personopplysningar. Les vilkåra nøye.
- Bruk magekjensla. Er denne kampanjen for god til å vere sann? Da er den som regel det – og har ofte ei bakside.
Når uhellet først er ute
Har du latt deg lure av svindlarane? Då har Forbrukarombodet følgjande råd:
- I alle e-postar og SMS-meldingar skal du ha moglegheit til stanse vidare marknadsføring. Sjå etter dette.
- Får du ikkje stansa reklamen kan du søke på internett for å prøve å finne ut kva slags selskap som står bak, og send selskapet ein e-post der du ber dei fjerne deg frå sine lister, samt be om ei stadfesting på at det blir gjort.
- Send oss ein klage dersom det ikkje stoppar. Dette kan du gjere gjennom vårt klageskjema.
- Dersom du blir trekt for pengar frå bankkortet ditt utan at du har godteke dette, kontakt utstedar eller banken din så fort som mogleg. Etter finansavtalelova er banken i utgangspunktet ansvarleg for tap som skuldas uautoriserte betalingstransaksjonar.
- Treng du råd eller bistand om pengetrekk kan du kontakte Forbruker Europa dersom motparten er frå eit europeisk land, eller Forbrukerrådet for råd om korleis du skal gå fram overfor eit norsk selskap eller banken din.