Før jul behandla Marknadsrådet ei klage frå Sport Outlet på eit forbodsvedtak mot sportskjeda.
I vedtaket frå Forbrukarombodet (no Forbrukartilsynet) kom det fram at Sport Outlet mellom anna har lurt forbrukarar til å tru at dei får ein større prisfordel ved å handle hos Sport Outlet enn dei i realiteten gjer.
Må ikkje lure forbrukarane
Sport Outlet klaga på vedtaket til Marknadsrådet, men Marknadsrådet tok ikkje klaga til følge.
– Når ein er på jakt etter eit godt kjøp, er det lett å bli lokka av løfter om prisavslag. Difor er det viktig at prismarknadsføring er sannferdig og at forbrukarar ikkje blir lura av villeiande prissamanlikningar, seier Elisabeth Lier Haugseth, direktør i Forbrukartilsynet.
Sport Outlet må betale 800.000 kroner om dei bryt vedtaket.
Oppheva vedtak mot XXL
Marknadsrådet har også behandla XXL Sport & Villmark si klage på forbodsvedtak mot sportskjeda. Spørsmålet i saka var om XXL nytta villeiande før-prisar i salsmarknadsføring.
Marknadsrådet har tidlegare sagt at det er den lågaste prisen ei vare er selt for i perioden rett før salet som forretninga må bruke som førpris. I saka mot XXL modifiserte Marknadsrådet dette og konkluderte med at sal til medlemmar i XXL sin kundeklubb ikkje treng å reknast med når XXL skal oppgi førprisar.
– Vi tek Marknadsrådet si avgjersle til etterretning, og vil no vurdere kva konsekvensane av dette vil bli for saker fram i tid, seier Haugseth.
